Madrilgo Justizia Auzitegi Nagusiaren 2023ko urtarrilaren 20ko auto baten arabera, Defentsa Ministerioak 1980an Erronkariko Ibarreko Batzar Nagusiak Belaguan utzitako lurzorua itzuli behar du, garai hartan zegoen bezala. "Bere egoera naturalera itzuli behar du", zehazten du. Horretarako, abandonatuta eta hondatuta dagoen General Garrido aterpe militarra eraitsi beharko du Espainiako Gobernuak.
Erronkariko Ibarrak urteak daramatza armadak Belaguako hondatutako babeslekua haranari baldintza egokietan entregatzera edo eraistera behartzen zuen epaia noiz beteko zain. 2005ean interes militarrik gabekotzat jo zuen Armadak babeslekua, eta Defentsak jakinarazi zuen Batzarrari itzuli behar zitzaizkiola lurra eta eraikina. Txosten tekniko baten ondoren, Erronkarik baldintza egokietan itzultzeko eskatu zion ministerioari 2008an.
Uko egin zion horri Espainiak 2010an, eta bide judiziala abiatu zen. 2013an jaso zuen Erronkarik aldeko lehenengo sententzia. Epaileek esandakoa ez dute bete, ordea; eta beste auto batek hori egiteko eskatzen die orain.