2019an ezarri zen Glovo Nafarroan, hainbat salaketa abiatu zituen orduan LAB sindikatuak. 2021ean Rider legea ezarri zuten, Auzitegi Gorenak banatzaileak langileak izan behar direla ebatzi zuen, eta Iruñeko Auzitegiak ere hori berretsi zuen, ondoren. Glovok sententziak errekurritu ditu, eta kontraturik gabe daude langileak. "Zergatik? Nahiz eta isuna ordaindu, irabaziak galerak baino handiagoak direlako. Enpresari ez dio kalte egiten", azaldu du LAB sindikatuko Berta Garciak.
Poliki doa Glovoren kontrako borroka. Sententzia bakarra irabazi du sindikatuak, momentuz, eta soilik 2019an eta 2020an enpresarentzat aritutako langileei dagokie. Geroztik asko izan dira, ordea, Glovoren motxila jarri dutenak. Irailean enpresaren kontrako bide penalari ekin zion sindikatuak. "Fiskaltzarengana jo genuen, eta aurreko astean Bartzelonan izan ginen. Ez da gutxi", iritzi dio Garciak. "Onartu baharko lukete badagoela enpresa bat esklabuen eredua ezartzen ari direna, eta isunen gainetik aurrera jarraitzeko gai dena. Bide penalak langileei egindako mina errekonozitzeko modua ekar dezake".
Funtsean, bi ereduen arteko talka gertatzen ari dira Garciaren iritziz, oligarkiak eskubiderik gabeko lan eredua ezarri nahi duelako.
