Atzo uko egin zion elkarte ultrakontserbadoreak Osasun departamentuko ordezkariekin biltzeari, eta kontra proposamen bat helarazi zion gobernuari. Minoritarioa da sindikatua sektorean, baina osasuneko mahai sektoriala eta mahai orokorra saihestu nahi ditu, eta adosten dutena zuzenean argitaratu dadila aldizkari ofizialean.
500 euroko soldata igoera nahi dute hilean, ez 400 eurokoa, departamentuak proposatu bezala; eta ohartarazi dute hori bermatzen duen akordio parlamentario bat egon ezean ez dutela greba bertan behera utziko.
Esklusibotasuna erabat ez ezabatzeak ere are gehiago urrundu ditu aldeak. Alor pribatuan mediku gisa jardun nahi dute-eta, hori egiteko bateraezintasunagatik egun jasotzen den ordainsaria galdu gabe.
Azken hauteskundeetan, 2019ean, 1.100 boto inguru eskuratu zituen sindikatuak. Atzo, berrehun bat pertsona bildu zituen Sarasate pasealekuko protestan.
