Nafarroako Gobernuko Osasun departamentua araudi moldaketa bat aztertzen ari da, osasun publikoan lan egiten duten medikuen esklusibotasuna ezabatzeko. Sindikatu Medikuaren aldarrikapenetako bat da, iragarri duten grebaren aurrean. Esklusibotasunaren ezabapenak alor pribatuan lan egiteko aukera emanen lieke 2.300 profesional ingururi, soldatan murrizketarik izan gabe.
Aukeraren aurrean, ezadostasun irmoa erakutsi du EH Bilduk. “Aurrekontuen negoziazioan planteatu zuten, eta beste talde batzuekin batera ezetz esan genion”, azaldu du Bakartxo Ruizek. “Esklusibotasuna kentzen badute Navarra Sumarekin izanen da, eta guretzako akordioarekiko desleialtasuna izanen da”. Parlamentari subiranistaren iritziz, neurriak ez du problemarik konpontzen osasungintza publikoan: “Osasungintzaren pribatuari eginen lioke mesede”.
Geroa Baik, berriz, gobernuaren argudioak entzun nahi ditu. Gaur gaurkoz, baina neurria ezabatzearen aurka daudela zehaztu du Uxue Barkosek: “Ezin da izan grebari aurre egiteko erreminta bat”.