Iruñeko Haur Eskoletako ehun langile baino gehiago bildu dira eskola publikoen alde eta 2023-2024 ikasturterako ratioen balizko igoeraren aurka.
Elkarretaratzea egin dute asteazken arratsaldean Iruñeko Udaletxe plazan, zerbitzuaren "ibilbide luzean tokiko zein nazioarteko erreferentzia izan den zerbitzuaren kalitatea" defendatzeko. Salatu dute "ratioen igoeraren ondorioz, hezitzaile garen aldetik" ezin dutela "haurren eta familien beharrei erantzun nahiko genukeen moduan".
Aldarrikatu dute "lehen haurtzaroa errespetuz laguntzea" dela haien lanaren oinarria, eta horretarako ezin direla "eskolak gehiago masifikatu".
Datozen egunetan deialdi gehiago egingo dituztela ohartarazi dute eta hezkuntza komunitate osoari dei egin diete "haur eta txikien eskubideen defentsan" parte har dezan.