Amaitzat eman du egungo ordutegien izaera esperimentala Hezkuntza departamentuak. Ordutegiak arautzeko foru agindu berria idazten ari dira, eta indarrean sartzen denean, ikastetxe guztiek berriro erabaki beharko dute zein ordutegi nahi duten.
Hezkuntza komunitatearekin egindako prozesu parte hartzailea bukatu ondotik eman du jakitera erabakia Hezkuntzak. Eragileek eskatu bezala, araudia onartu aurretik gertatukoaren ebaluazioa eginen dute. “Hainbat urtetan luzatu da esperimentua. Orain nahi dugu serioski hori baloratzea, akademikoki zer ateratzen den ikusteko”, azaldu du Sortzeneko Aitziber Garmendiak.
Zein jardunaldi hobesten duen zehaztu gabe, jardunaldiaz gain, horri lotutako jarduera eta zerbitzu guztiak arautzeko eskatu du Sortzenek.
17-18 ikasturtean hamahiru ikastetxek zuten jardunaldi jarraitua. Gaur egun, 154 ikastetxek dute ordutegi hori, ia publiko guztiek. 65 zentroetan ari dira ordutegi malguarekin (28 publiko eta 37 pribatu). 24-25 ikasturterako hartu den erabakiak, hiru eta bost urte arteko iraupena izanen du.