ELA sindikatuak kritikatu du Siemens-Gamesak argitu gabe jarraitzen duela "multinazionalak Estatuan 475 postu suntsitzeko proposatutako doitze prozesuak Nafarroan izango duen eragina". Hori dela eta, eskaera formal bat aurkeztu du datu gehiago biltzeko, oraindik ez baita ezagutzen lantokika izango duen eragina.
Ohar bidez sindikatuak jakinarazi du, ostegun honetan Zamudion (Bizkaia) izan dela Siemens-Gamesako Enplegu Mahaiaren lehen bilera. Bertan, enpresak oraindik ez du argitu Euskal Autonomia Erkidegoko eta Nafarroako lantokietako kaleratzeen irismena, ezta lantokietan izango duen eragina ere. Era berean, ez du "enpresaren asmoak bermatzen dituen" datu zehatzik eman . Nolanahi ere, bileren egutegia finkatu dute.
Datu gehiago biltzeko asmoz, ELAk eskaera formal bat aurkeztu dio enpresari, Europa mailako bileran landutako informazioa lortzeko, bertan, gai hori aztertu baitzuten aldez aurretik. Era berean, sindikatuak kritikatu du informazio faltak "tentsio handiagoa" sortzen duela azken lau urteetan hirugarren doikuntza-prozesuari aurre egin behar dion plantilaren barruan.
Siemensen eta Gamesaren arteko "bat-egite txarra" gertatu zenetik enplegua etengabe suntsitzea salatu dute sindikatuek sarri, eta egoera hori "larriagotu egin da Siemens Energyk ekainean iragarritako EEPaz geroztik" azpimarratu du ELAk.
Ildo horretan, sindikatuak errefusatu egin du multinazionalak Estatuan 475 postu suntsitzeko planteatutako doikuntza prozesu berria, eta etorkizuneko enplegua bermatuko duen industria plan "sendoa" eskatu du.
