Eduardo Santos Nafarroako Gobernuko Migrazio Politiketako eta Justiziako kontseilariak foru agindu bat sinatu du ostegun honetan, Eliza katolikoaren esparruan "osotasun fisikoaren, ukigabetasunaren eta sexu-askatasunaren aurkako erasoen biktimak aitortzeko" Batzordeko zazpi ordezkariak izendatzeko.
Batzordea, formalki hilabeteko epean eratuko beharko dute. Orain sortuko den batzordearen helburua da aurkeztutako aitortza eskaerak baloratzea eta, lehen aipatutako foru legearen babespean, eskaerak onartzea edo ez onartzea proposatzea, eta, hala dagokionean, Nafarroako Eliza katolikoan abusuen biktima deklaratzeko proposamena egitea.
Foru aginduan Ana Carmona Juanmartiñena eta Esther Aldave Monreal izendatu dituzte, Nafarroako Parlamentuak proposatuta. Mikel Lizarraga Rada eta José Antonio Echauri Tijeras dira sexu-abusuen biktimen elkarteek aukeratutako bi ordezkariak; Nafarroako Gobernuak, berriz, Mikel Cordoba Gavin eta Camino Bueno Zamarbide proposatu ditu, eta, aldi berean, Izaskun Gartzaron Zudaire Nafarroako Delituaren Biktimei Laguntzeko Ataleko burua izendatu du batzordeko idazkari.
24/2022 Foru Legeari jarraiki, parte hartzeko eskubidea duten Eliza katolikoaren bi ordezkariak ez dituzte izendatu, "Nafarroako Eliza Katolikoaren hierarkiak uko egin baitio batzorde horretan parte hartzeari", baina Nafarroako Gobernuak "ateak zabalik ditu eta mantenduko ditu erakunde erlijiosoa modu ofizialean ordezkatuta egon dadin batzordean".
