Lan erreforma onartu eta zazpi hilabetetara, Nafarroan lanpostuen behin-behinekotasuna eta partzialtasuna jaitsi direla azpimarratu du CCOO-ek, erreformak lan merkatuan izan duen eragina aztertzeko argitaratu duen txostenaren arabera. CCOO-eko Joseba Eceolazak egoeraren balorazioa egin du eta erreformak lan-merkatuak izan duen eragina “zuzena, positiboa eta azkarra” izaten ari dela nabarmendu du.
Datozen hilabeteetan emaitza positiboagoak espero ditu sindikatuak. Zehazki, datuei erreparatuta langabezia tasa % 8,7 koa da eta 2009ko krisiaren aurretiko datuetara hurbiltzen da. Muturreko behin-behinekotasuna edo 7 egun baino gutxiagoko kontratuak ere behera egin dute aurtengo bigarren hiruhilekoan; azken hamar urteetako zifrarik baxuena izan da hain zuzen, %32 a, %39 aren aurrean. Sindikatuak azpimarratu duenez, lan-erreforma onartu zenetik kontratuen behin-behinekotasuna nabarmen jaitsi da. "Duela urtebete sinatutako kontratuen % 93 aldi baterakoak baziren, gaur egun aldi baterako kontratuak % 80 dira, hamahiru puntu gutxiago", azpimarratu du.
Behin-behinekotasuna ez ezik partzialtasunaren egoera ere aldatu da. Izan ere, 2021arekin alderatuta, hiru puntuko jaitsiera izan du 2022ko bigarren hiruhilekoan. Bestalde, CCOOek nabarmendu duenez, enplegua sortzeaz gain iraunkortasunari dagokionez, kalitatea handitu da. Soldatei begira, Lanbide Arteko Gutxieneko Soldataren igoera "aldarrikapen sindikal zentrala izango da berriro, soldata baxuenak berreskuratzeko eta lan-pobreziaren aurka borrokatzeko".
Inflazioari aurre egiteko proposamenak tartean eta soldata-arrakala gainditzeko neurriez gain, etorkizunari begira CCOO-ek genero-arrakalari aurre egiten jarraitzeko neurriak gogortzearen beharra nabarmendu du.
