Uztailaren 15ean Abiadura Handiko Trenaren (AHT) obretan lanean ari zela larriki zauritu zen langilea hil dela jakinarazi du LAB sindikatuak. Heriotza salatu du sindikatuak: "Heriotza hori bereziki krudela eta mingarria da, ez baita beharrezkoa, alferrikako azpiegitura baten obrak baitira". Istripua gertatu zeneko inguruabarrei buruzko ikerketa "serio eta sakona" eskatu du LABek, "egon zitezkeen erantzukizun guztiak argitzeko".
AHTaren obretan lanean ari direnen baldintzak salatu ditu, halaber sindikatuak: "Nafarroan hainbat sute larri suertatzen ari ziren bitartean eta jarduera asko geldirik zeudela, AHTren arduradunek jarduerarekin jarraitzea erabaki zuten, langileei arrisku handiko bero-baldintzetan lan egitera behartuz eta, ondorioz, lan-istripu bat izateko aukerak biderkatuz".