Mobilizazioa 18:00etan abiatu zen, Nafarroako hiriburuko autobus geltokiko zelaigunetik, “Aitormena. Konponketa. Ez errepikatzeko bermeak” zioen pankarta buruan zuela. Zaragoza etorbidetik, Bianako Printzearen plazatik, Nafarroa Behereko etorbidetik, Merindadeetatik eta Karlos III.a etorbidetik igaro zen, eta Askatasunaren plazan amaitu zen.
Bertan izan dira, besteak beste, Unai Hualde Nafarroako Parlamentuko presidentea, Ana Ollo Foru Gobernuko Herritarrekiko Harremanetarako kontseilaria, Jabi Arakama Geroa Baiko parlamentaria eta Bakartxo Ruiz EH Bilduko Parlamentuko bozeramailea.
Askatasunaren Plazan, Memoriaren Aldeko Herrien Koordinakundeko (Amapola del Camino) Ramón Contrerasek eta Amaia Merino zinemagileak hartu zuten parte, sarearen manifestuarekin bat egin duten erakunde, gizarte-eragile eta kolektibo kulturaren ordezkarien eledun gisa.
Jorge Txokarro Nafarroako Torturatuen Sareko ordezkariak ere eskerrak eman ditu mobilizazioan parte hartzeagatik eta jasotako babesagatik. Esan duenez, erantzun "izugarria" izan da, "zimenduak eraikitzen ari dira" eta "olatu erraldoi bat sortzen ari da Nafarroan torturatutako pertsonen errekonozimenduaren alde".
"Estatuko segurtasun indarrek gure erkidegoan eragindako tortura kasuak argitzeko egiten ari diren urratsak" txalotu zituen Txokarrok, “baina Nafarroan 1.000 tortura kasu baino gehiago aitortzeko eta konpontzeko egin beharreko bidea oraindik luzea izango da", gaineratu zuen.
"Mendeku nahietatik urrun, gure bizikidetza beste balio batzuetatik eraiki nahi dugu, etorkizun hobea proiektatuz, baina iragana ahaztu gabe", azaldu zuen Txokarrok. "Gizarteari eta hurrengo belaunaldiei zor diegu gertatutakoa argitzea, torturaren praktika desagerrarazteko modurik eraginkorrena baita", gaineratu zuen.
Honatx Ahotsa.info atariko lankideek manifestazioan grabaturiko bideoa: