Ikastetxeen kudeaketa finantzatzeko moduluak aldatzeko neurria proposatu die Hezkuntzak: datorren ikasturterako 4.250.000 euro inguruko igoerarekin, beste soldata-igoera bat, kontratazio gehiago eta ordezkapenak hobetzea ahalbidetuko luke. Aurrekontu hori aurtengo irailetik aurrera aplikatuko litzateke, eta gobernuaren iritziz "bat dator" hezitzaileen plataformaren eskakizunekin.
Planteamendua "ez zaie gustatzen", aldiz, langileei, "Eskasa" dela esan dute, "guztiz ekonomizista delako eta ez delako benetako apusturik egiten" haur-eskoletako haurren bizi-kalitatea hobetzeko. Eider Gardek adierazi duenez, plataforma sakon aztertzen ari da proposamena, irakurketa "osatuagoa" izateko. Gaur arratsaldean bilduko dira langileak horretarako. Atzo berriz, bileraren atarian egin zuten protesta hezitzaileek.
Oraingoz grebarekin jarraituko dute. Gaur 46. eguna dute, eta ostegunero bezala protesta egiten ari dira une honetan Nafarroako Parlamentuaren atarian.