Sergio Sayasek eta Carlos Garcia Adanerok haien plataforma ofizialki aurkezteko ekitaldi politikoa eginen dute asteartean, hilak 14, 19:30ean, Iruñeko Tres Reyes hotelean. Martxoan UPNtik bota zituztenetik, bi diputatuok publikoarekin eginen duten lehen agerraldia izanen da. Ordutik, sostenguak biltzen ari dira, haien proiektuaren bideragarritasuna ikustarazte aldera. Haien webgunearen arabera, dagoeneko 1.300 jaso dituzte.
Ekitaldia iragartzeko kartelean (ikusi behean), Plataforma Navarra (Plataforma Nafarra) marka erabili dute. Afixan darabilten iruditeria nahikoa adierazgarria da: Espainiako bandera eta Nafarroakoa bat eginda ageri dira, baina askoz hobeki ikusten da lehena bigarrena baino.
Oraindik ez dute argitu 2023ko udal eta foru hauteskundeetara aurkeztuko diren, baina aurkeztetik gero eta hurbilago aiderazten ari dira haien adierazpen publikoetan. “Argi dago tokia badagoela; izan ere, bi aukera daude, PSNren eta bosteko gobernuaren makulu izatea ala egiazko oposizioa egitea”, azaldu du Adanerok.
UPNk oraindik ez du argitu bakarrik aurkeztuko den foru eta udal hauteskundeetara, edo Navarra Suma koalizioa errepikatzen ahaleginduko den. PPko Nafarroako buru Ana Beltranek Sayasi eta Adanerori ateak ireki dizkie, baina UPNrekin bat egiteari ateak itxi gabe, eta ez dago argi Feijook zer erabakiko duen. Eskuin muturreko Vox alderdia indar handia hartzen ari da hauteskunde ziklo berrian.
Hau da, lau eragile ari dira lehian orain arte bat eta bakarra izan den hauteskunde eremuan. Pentsatzekoa da haien arteko aliantzak izanen direla. Ikusi beharko da Sayasen eta Adaneroren plataformak zer egiten duen. Edo zer egiten uzten dioten. Gertuen PP dutela ematen du, baina ezin ahantzi Madrilen, Diputatuen Kongresuan, Vox eta haren eremu mediatikotik oso hurbil mugitu direla.
El próximo martes, 14 de junio, en el hotel Tres Reyes de Pamplona, celebraremos el primer acto público de la plataforma que estamos impulsando @GarciaAdanero y yo.
— Sergio Sayas (@sergiosayas) June 8, 2022
Os esperamos ! pic.twitter.com/CSlOyaE3Gf