Ratioak jaistea, soldatak igotzea eta langileak gehitzea eskatzen dute, batez ere, 0-3 plataformako kideek. Eskaera horietara heltzen ez den proposamena egin zien gobernuak joan den astean, greba bertan behera uztearen truke. Horri ezetz esan zioten langileek, eta atzo bildu ziren azkenekoz Nafarroako Gobernuko eta Udalerrien Federazioko ordezkariekin.
PSNko Ramon Alzorrizek adostasun politikoa eskatu du, aurrekontuetan langileen eskariei erantzun ahal izateko. Hor dago “giltza” plataformako kideen iritziz. Aldarrikapenei erantzuteko aurrekontua handitzea beharrezkoa dela adierazi zieten, atzo bileran. Testuinguru horretan, protesta gogortzea erabaki dute langileek eta Nafarroako Parlamentuan pardelak bota dizkiote Maria Txibite presidenteari osoko bilkurara iristen ari zela.
Aurrekontuetan aldaketak ezartzeko lan politikoa ahalik eta azkarren egitea ere nahi dute langileek, eta espero dute datorren asteazkeneko bileran Foru Gobernuak "finantza-mailan definitutako eta argi eta bermatuta proposamen bat" egitea. Atzoko bilerara gobernuak ez zuen proposamenik eraman, salatu dutenez plataformako kideek.
