Halako eskaerak CHEri “asko gustatzen” zaizkiola salatu du Urbizi Elkarteko Belen Ausejok Euskalerria Irratiko Metropoli Forala saioan: “Zientzialariek, teknikariek, ibaiez dakitenez, aspaldidanik esana dute garbiketaren kontra daudela, baldin eta garbiketatzat badugu ibaien ibilguak dragatzea eta ibaien dinamikentzat oso garrantzitsuak diren solidoak, sedimentuak kentzea”.
Gauzak horrela, Ausejoren aburuz, “egun ezin da garbiketa mota hori defendatu gutxieneko ezagutza bat baduzu, kultura eza ikaragarria adierazten du”.
Urbizi elkarteko kidearen irudikoz, gakoa uholde eremuetan ez eraikitzean datza. “Uraren Kultura Berriaren Fundazioan badago Pedro Arrojo izeneko hidrogeologo bat, Zaragozako Unibertsitateko irakaslea dena, eta hark oso ongi azaltzen du: ibaiak noizean behin gugana datoz, jabego agiriarekin, erakusteko uholde-eremuak norenak diren”, azaldu du.
“Ibaiarenak diren eremuetan eraikitzen dugu, eta iruditzen zaigu urtegiekin aski dela han uholderik ez izateko, edo babes batzuk jarrita. Horiek ibaiari kaltea egiten diote eta guri segurtasun sentsazio faltsua ematen digute”, gaineratu du Ausejok.
