Osasun Departamentuak, bihartik aurrera, osteguna, eta modu progresiboan, norberak hitzordua hartzeko sistema ezarriko du (gripearen kanpainan eta osasun etxeetan internet bidezko zitak eskatzerakoan erabiltzen denaren antzekoa) txertaketa prozesua azkartu eta areagotzeko; izan ere, txertaketa biztanleria talde ezberdinetara iritsi da eta xede-populazioa handia da.
Txertoak jaso ditzaketen pertsonek SMS bat jasoko dute hitzordua internet bidez edo telefono bidez hartzeko. 70-79 adin tarteko herritarrak izanen dira lehenengoak mezua jasotzen.
Gaur egun txertaketa-prozesuan diharduten gainerako biztanle-taldeek eta talde espezifiko aktiboek, oraingoz, telefono bidezko zuzeneko zitazio-sistemarekin jarraituko dute, eta, beraz, dei egin arte itxaron beharko dute, txertaketa-egunaren, -orduaren eta -lekuaren datuak emateko. Osasun departamentuak errekuperatzeko eta jarraipena egiteko deiak ere aurreikusten ditu adin-tarte edo talde bakoitzean.
Gainera, herritarrei informazioa emateko "Infovac" zerbitzua prestatu da, Nafarroa osorako telefono bakar baten bidez (948-370120) eta posta elektroniko baten bidez (vacunacion@navarra.es edo txertaketa@navarra.es), astelehenetik igandera, 08:00etatik 22:00etara, txertaketa-prozesuari buruzko edozein zalantza, kontsulta edo intzidentzia erantzungo duena, https://coronavirus.navat webgunearen osagarri gisa. Zerbitzu honek ez du txertoa eskatzeko balio. Era berean, Osasun departamentuak gogorarazi du ez dela osasun-zentrora deitu behar.
Gobernuak sistemaren aldaketa mailakatu horrekin lortu nahi du, alde batetik, erabiltzaileek beren txertaketa-agenda aukeratzeko aukerak handitzea, dosiak emateko egungo testuinguruaren mugen barruan, eta, bestetik, Osasunbidearen zitazio-gaitasuna handitzea, biztanleria-taldeak gero eta zabalagoak diren eta dosi eta txerto gehiago iristea espero den etapa berriei begira.
Jakina denez, Nafarroak hainbat taldetan txertatzen jarraitzen du: 60-65 urtekoetan (eta, geroago, 66-70 urtekoetan); 70-79 urtekoetan; eta COVID-19aren gaixotasun larria izateko arrisku handia dutenetan. Gainera, 80 urtetik gorakoen blokea ixten ari da, eta horien artean % 95ek lehen dosi bat jaso dute.
Txertaketa-estrategia mantendu egiten da, eta kasu jakin batzuetan baino ez da zitazio-sistema instrumentala aldatzen.
Zer egin: dei edo sms baten zain egon
Esan bezala, Osasunbidea-Nafarroako Osasun Zerbitzutik dei zuzen baten zain egon behar dute txertoak jaso ditzaketen pertsonek. Dei horretan, txertaketa-lekua, -eguna eta -ordua adieraziko zaizkie. Baina, 70-79 urte bitarteko taldeko zenbait adin-tarteren kasuan, SMS bat jasoko dute, hurrengo asteari begira hitzordua egiteko jarraibideekin, bai Internet bidez, bai telefono bidez.
Interneti dagokionez, testu-mezu horretan esteka bat agertuko da, pertsona bakoitzak, hurrengo 72 orduetan, txertoa hartzeko hitzordua lor dezan, prozesu erraz baten bidez Osasun Karpetaren webgunean: www.carpetadesalud.navarra.es. Osasun-karpetan alta emanda ez badago, osasun-txartelaren zenbakia edo OTI (CIPNA) eta jaioteguna aurkeztu beharko ditu.
Halaber, SMSak telefono bat eskainiko du, Osasun sailaren arabera (Iruñea, Lizarra eta Tutera). Telefono hori bera erabili ahal izango da hitzorduaren aldaketak kudeatzeko, osasun-karpeta bezala.
Eragiketa hori aurreikusitako epean bete ez bada (hiru egun, jasotzen denetik), edo beste kasu edo talde batzuetan (80 urtetik gorakoak, 60-69 urte bitartekoak, gaixotasun-arrisku handiko pazienteak eta pertsonak, etab.), baldin eta publikoki iragarritako epean zitatu ez badira edo hitzordu hori formalizatu ezin izan badute, OSNk itxiera- eta berrarrantza-deiak ere egingo ditu fase eta populazio-talde bakoitzean.
