Asteburuan Bidasoan izan den sutea itzalitzat jo dute

Sutearen irudi bat, Beran. (Foruzaingoa)

Nafarroako Gobernuko Suhiltzaileen Zerbitzuak itzalitzat jo du larunbatean Nafarroa, Lapurdi eta Gipuzkoa arteko mugaren eremuan piztutako sutea. Tenperaturen eta haizeen beherakadak eta euriak lagundu dute. 

Atzo arratsaldetik aurrera baldintza meteorologikoak aldatu dira; iparraldeko haizeak eta euriak tenperatura jaistea eragin dute, eta euria ere izan da. Ondorioz, itzali egin da Nafarroa, Lapurdi eta Gipuzkoa arteko mugaren eremuan larunbatean piztutako sutea.

Atzo bi gune aktibo zeuden, bat Nafarroan eta bestea Gipuzkoan, baina euriteek sua itzaltzea erraztu dute. Lan horiek burututa, sutea itzaltzeko lanetan parte hartzen ari ziren agenteak euren baseetara itzuli dira.
 
Azterketa egin beharko da orain, baina, Aitor Elexpuruk Berako alkate Euskalerria Irratiko Metropoli Foralean adierazi duenez, hipotesi nagusia da norbaitek nahita eman ziola su mendiari. Izan ere, bi sute piztu ziren, ia aldi berean, larunbateko 09:30 aldera, ondoan ez dauden bi tokitan. 

Datozen ordu eta egunetan, izandako kalteak zehatz-mehatz ebaluatuko dituzte. Behin-behineko neurketen arabera, 1.800 hektarea inguruko eremuari eragin dio suteak, horietatik erdiak foru erkidegoan. Ingurumen teknikariek eta baso Zaindegiko langileek zuhaiztietan duten eragina egiaztatuko dute. Sugarrak abiadura handian zihoazenez, litekeena da enbor askoren kasuan kanpoko geruza bakarrik erre izana, denbora labur samar bero handiaren eraginpean egon direlako, foru gobernuak jakitera eman duenez.

Dispositibo zabala

Nafarroako Gobernuak Basoko Suteen Arrisku Planeko bigarren fasea ezarri zuen  larunbatean. Nafarroatik, Cordovilla eta Oronozko parkeetako suhiltzaileak, Bera eta Lesakako suhiltzaile boluntarioak, eta basozainen zerbitzuko suhiltzaileak aritu dira sua itzaltzeko lanean. Gainera, Espainiako Gobernuari laguntza eskatu zioten, eta UME larrialdietarako unitate militarra ere bertaratu zen eremuan.  

Gipuzkoan, berrogei suhiltzaile eta basozain inguru aritu ziren lanea; Lapurdin, berriz, 96 suhiltzaile.