Nafarroa osoko adinekoen egoitzetan dauden pertsonen senideek kezka agertu dute, zentro horietan daudenek bizi dituzten egoerekin. Aurretik ezarritako "murrizketek, pribatizazioek, langile faltak, lan baldintzen prekarizazioak eta ikuskapen faltak" egoitzen zerbitzuen kalitatea hondatu dutela; baina COVID-19aren osasun krisiak hutsune horiek agerian utzi dituela nabarmendu dute.
Irizpide ekonomikoak gaileentzen direla eta informazio falta dagoela salatu dute, bai eta zentro pribatu eta kontzertatuen gaineko kontrolik ez dagoela ere, eta horrek egoiliarren osasunean eragina duela. Horren aurrean, kalitatezko eredu bat eskatu dute, irizpide argiekin eta banakako arreta planekin.
Parte hartze falta ere salatu dute. Egoitzen inguruan hartzen diren neurri eta protokoloen ebaluazioan parte hartu nahi dutela azpimarratu dute, eta administrazioari exijitu diote erabakiak hartzeko orduan, gizarte eragileekin harremanetan jar dadila.
Zainduz plataforma berriki sortu dute, eta Nafarroa osoko egoitzetan daudenen 30 senide inguruk osatzen dute oraingoz, baina gehiago izan nahi dute, antzeko egoeran daudenentzako erreferentzia bihurtzeko. Horretarako lehen urratsa, batzar ireki bat izango da: hilaren 27an egingo dute, arratsaldeko 18:00etan, Kondestablearen jauregian.