"Astakeria da eta zentzugabekeria da planteaturiko proiektua" adierazi du Oihana Olaberria Arakilgo alkateak, "Espreski babestutako Aralarko zonaldea zeharkatuko luke eta 5.000 zuhaitzen mozketa eragingo luke gas hodia Irurtzundik Lekunberriraino eramateko proposaturiko ibilbideak". Olaberriak azaldu duenez, ez da inolako azterketa topografikorik egin "Bidean zonalde karstikoa zeharkatzea proposatzen baita, bertan izanen diren zulo, leize eta abarrekin".
Arakil eta Larraungo Udalek helegitea aurkeztu diote proiektuari eta alternatiba ere jarri dute mahai gainean. "Irurtzun eta Lekunberri artean bada autobide bat, trenbide sare bat, bada zuntz optiko hoditeria...zergatik ez da bide hori erabiltzen?" galdetu du Mikel Huarte Larraungo alkateak. Alternatibak onura ekonomikoak ere izanen lituzte izan ere, hodia eraikita, ingurugiroa berreskuratzeko proiektuak 160.000 euroko gastua suposatuko luke Plazaolako alternatibatik joanez gero eta 2.6milioi eurokoa, Negdia Navarrak planteaturiko ibilbidetik eginez gero.
Helegitea ebatzi bitartean, proiektua bertan behera geratzea eskatu dio Adolfo Araiz, EH Bilduko parlamentariak Nafarroako Gobernuari.