Material eskaintza berrien aurrean, Osasun Sailak kanal bakarra ezarri du dohaintzak jasotzeko, eta horrek horiek kudeatzea eta behar bezala banatzea erraztuko du. Horretarako, Nafarroako Osasun Publikoaren eta Lan Osasunaren Institutuak materialen banaketa bideratuko du Lan Osasunaren egoitzaren bidez. Egoitza Landabengo industrialdean dago, E eta F kaleetan, Iruñean.
Zerbitzu horrek babes-materiala jasoko du, hala nola FP2 edo FP3 autofiltratzaileen maskarak, betaurrekoak, eskularruak eta maskara kirurgikoak, eta gaurtik, martxoaren 23tik, goizeko 8etatik aurrera dago zabalik. Herritarrek, enpresek, sindikatuek eta abarrek, gainera, materialaren ekarpenei buruzko edozein zalantza kontsulta dezakete 848 42 34 40 telefonoaren bidez.
Nafarroako Gobernuak, halaber, materiala ekoizteko eta egiteko hainbat ekimenen eskaintza ugari jaso ditu, diseinatzaile, ingeniari edo norbanako taldeen bitartez.
Ekimen horiei guztiei erantzuna emateko eta horiek guztiak koordinatzeko asmoz, Gobernuak webgune espezifiko bat du gaituta, non herritarrek, udalek, enpresek edo boluntariotzako taldeek izena eman dezaketen, eta beren lankidetza eta ekimenak eskaini. Horiek erregistratu eta argitaratzeko prozesu labur baten ondoren, Nafarroako Gobernuak kasuan kasuko departamentuaren bidez kudeatuko ditu eskaintzak, garatzen dituenarekin zuzenean harremanetan jarrita, betiere Osasun Publikoko jarraibide eta protokolo orokor eta espezifikoei jarraikiz.
Gobernuak gogorarazi du, gainera, plataforma berean boluntariotzako hainbat ekimen inskriba daitezkeela, biztanleria zaurgarriari ematen zaion arreta publikoa osatzeko, eta beharrezkoak izanez gero erabiliko direla.
