Kontingentzia-plan bat onartu du gobernuak administrazioko langileentzat

Euskalerria Irratia 2020ko mar. 12a, 14:39

Telelana eta mendeko adingabe zein adinekoen arreta erraztuko da zentroak ixten direnean; gainera, bilerak, bidaiak eta ikastaroak atzeratuko dira, eta herritarrei izapidetze telematikora jotzea eskatuko zaie.

Nafarroako Gobernuak Kontingentzia Plan bat onartu du Foru Komunitateko Administrazioaren eta haren erakunde autonomoen menpeko lantokientzat zein langile publikoentzat , baita Administrazioaren zerbitzura daudenentzat ere.

Agindu horrek honako neurri hauek jasotzen ditu, hargatik eragotzi gabe langile guztiak zerbitzuaren premien mende egotea eta, hala eskatzen zaionean, zerbitzu publikoak emateko prest egotea:

  • Isolamendu-egoera. Beharrezko neurriak hartuko dira Nafarroako Foru Komunitateko Administrazioaren eta haren erakunde autonomoen zerbitzura dauden langileek, COVID-19ren ondorioz isolatuta badaude, beren ordainsarien ehuneko ehun jasotzen jarrai dezaten egoera horretan dauden bitartean.
  • Ikastetxeak edo adinekoak ixteko neurriak. Langileei, baldin eta beren ardurapean adingabeak edo mendeko adinekoak badituzte eta ikastetxeen edo adinekoen itxierak eragiten badie, honako neurri hauek aplikatuko zaizkie, zehazten den denboran:
    • Lanaldiaren malgutasuna
    • Beharrezkoa bada, langileek beren etxean jarraitu ahal izango dute, ezinbesteko betebehartzat hartuta. (Bi gurasoak edo mendeko nagusiaren arduradunak Nafarroako Administrazioaren eta haren erakunde autonomoen zerbitzuko langileak badira, ezingo dituzte neurri horiek aldi berean hartu).
  • Jendearentzako arreta. Telefono bidezko arreta eta arreta telematikoa lehenetsiko dira. Aurrez aurreko arretaren kasuan, beharrezkoa izanez gero, zerbitzua emango dela bermatzeko ezinbesteko txandak ezarriko dira. Kasu horretan, Nafarroako Gobernuak herritarrei eskatzen die aurrez aurreko zerbitzuak soilik erabil ditzatela behar-beharrezkoa denean, eta telefono bidezko arreta edo arreta telematikoa erabili ahal izango da izapide gehienetarako.
  • Bilerak. Ahal den neurrian saihestuko dira, beste herri batera joatea dakartenak bertan behera utziko dira eta bideokonferentziaren erabilera sustatuko da. Ildo horretan, atzeratu egin dira Nafarroako Jauregian egindako harrera ofizial guztiak, baita taldeen bisitak ere.
  • Prestakuntza-ikastaroak eta jarduerak. Atzeratu egingo dira, ezinbestekotzat jotzen direnak izan ezik, eta baliabide telematikoak erabiltzea baloratuko da, ahal denean.
  • Hautaprobak. Deialdia egiten duen organoak atzeratu egin beharko du hautaprobak egitea, ezinbestekoa den denborarako, batez ere lehia masibokoak, betiere prozesuek aurrera jarraituko dutela bermatuz, COVID-19 sistemari eusteko hartutako neurriekin zerikusia dutenak izan ezik.
  • Bidaiak. Funtsezko zerbitzuak normaltasunez emateko ezinbestekoak ez diren lan-bidaia guztiak atzeratzea gomendatzen da.
  • Aurrez aurrekoak ez diren lan-modalitateak. Behar bezala justifikatutako kasuetan, baimenduko dira, Zuzendaritza Nagusiko edo dagokion langileak atxikitzeko eremu organikoko titularraren aldez aurreko baimenarekin. Ildo horretan, Jaurlaritzako sail guztietan estrategikotzat jotzen diren langileak identifikatzen lan egiten da, bai eta horietako bakoitzarentzat ordezko bi pertsona identifikatzen ere, telelana lehentasunez gaitzeko eta, ondoren, behar duten gainerako lanpostuei helarazteko.
  • Txandak berrantolatzea. Txandak berrantolatu behar badira, sail bakoitzak, bere antolamendu-esparruaren barruan, txandak zehaztea proposatuko du.
  • Jarraipena. Funtzio Publikoaren Zuzendaritza Nagusiak txosten bat egingo du neurri horiek indarrean dauden bitartean zerbitzuen funtzionamenduan duten eraginari buruz.

Kontingentzia-plan horren barruan beste neurri batzuk ere jasotzen dira, hala nola sistema ezarrita duten eraikinetara hatz-marka digitalarekin sartzea baliogabetzea, pertsona horientzako lanpostutik fitxaketa birtuala gaituz.

Bestalde, kolektibo estrategiko gisa identifikatu dira foru-poliziak, suhiltzaileak, osasun-langileak, laguntza-langileak, babes zibileko langileak eta informatikakoak.

Sos Navarra 112 zerbitzua

Bestalde, 112 zerbitzuari dagokionez, langileen errefortzuak ezarri dira, eta datozen egunetan zabaltzea aurreikusten da, sistema arintasuna eta operatibitatea bermatzeko behar diren baliabideekin une oro artatzeko. Atzo 3.115 dei jaso zituen zerbitzu horrek, eta otsailaren 24an 2.109 izan ziren (Nafarroan koronabirusaren lehen kasu positiboa antzeman zen asteko lehen egunean). Lehen kasu positiboa antzeman zen egunetik, martxoaren 1etik, egunero deiak ugaritu egin dira.

Horri dagokionez, herritarrei gogorarazten zaie 112 zenbakia erabili behar dela pertsona batek arnasketa-sintomak dituenean eta arrisku-eremu batera bidaiatu duenean edo koronabirus bidezko infekzioa duen pertsona batekin kontaktuan egon denean. Hala ere, zalantza medikoak argitzeko, osasun-aholkularitzako zerbitzuarekin jarri behar da harremanetan 948 290 290 telefonoan.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!