SOS Nafarroako 112 telefonoan jasotako deien %12 "desegokiak" dira, eta, beraz, informazio eta kontzientziazio kanpainak egin behar direla egiaztatu da, herritarrak jabetu daitezen ematen duen zerbitzuaren garrantziaz eta erabilgarritasunaz, eta ez dezaten baliabideak gaizki erabili; horrek esku-hartzeak eraginkorragoak izatea eragin baitezake.
Nafarroako Parlamentuko Presidentetza, Berdintasun, Funtzio Publiko eta Barneko Batzordeak Foruzaingoaren Aginte eta Koordinazio Zentroaren (AKZ) eta SOS Navarra 112 Larrialdiak Kudeatzeko Zentroaren instalazioetara egindako bisitan agerian geratu zen hori. Parlamentuko ordezkaritza Foruzaingoaren egoitzan jaso zuten Amparo Lopez Nafarroako Gobernuko Barne zuzendari nagusiak, Juan Carlos Zapico Foruzaingoko buruak eta Jose Javier Boulandier Babes Zibileko eta Larrialdietako zuzendariak.
Bisitaren helburua AKZk eta Larrialdiak Kudeatzeko Zentroak dituzten teknologia eta baliabideak ezagutzea zen, baita lan-prozedura eta koordinazio-sistemak ere. Batzordeko kideei AKZk garatzen duen jardueraren berri eman zitzaien; izan ere, herritarrei edo 112 telefono-zenbakitik egindako deiei zuzeneko arreta ematen dieten sei terminal ditu, eta polizia-baliabideen 27.460 mobilizazio egin ziren, AKZko ikuskatzaile nagusi Eugenio Rosek azaldu zuenez.
Ondoren, Parlamentuko Batzordea SOS Nafarroa larrialdiak kudeatzeko zentro iraunkor, bakar eta integratura joan zen, herritarrek 112 telefonoaren bidez jakinarazten dituzten gorabeherei erantzuteko behar diren baliabideak aktibatu eta koordinatzen dituena. Amparo Lopezek eskatu zuen "lankidetza eta ahalegina sistema indartzeko, giza baliabideen eta teknologiaren bidez". Zuzendari nagusiak aurreratu zuenez, “Barne arloa modernizatzeko plan batean ari da lanean, eskura dauden zerbitzuak errentagarri egiteko, eta beharrak zehazteko fasean daude. Diagnostikoa amaituta dagoenean Legebiltzarrean aurkeztuko dugu".
SOS Nafarroako buruak, Daniel Canok, instalazioak erakutsi zituen eta azaldu zuen artatutako deien %12 "desegokiak" direla, eta azpimarratu zuen komeni dela ehuneko hori murriztea, herritarrak kontzientziatzeko kanpainen bidez, laguntza-baliabideak behar ez dituzten gorabeheretara desbideratzeak eragiten dituen kalteak agerian uzteko. Larrialdiak Kudeatzeko Zentroaren lan-txanda bakoitzaren dotazioa honako hauek osatzen dute: aretoko buruzagitza batek, 10 operadorek, guardiako mantentze-lanetako teknikari batek, suhiltzaileen guardiako arduradun batek, mediku koordinatzaileek eta herri-lanetako teknikari batek.