Astebururo ehunka, milaka kilometro egitera behartuta, beren eskubideen urraketa salatu dute presoen senitartekoek eguerdian Iruñean egindako protestan. "Urte luzeak dirauen gatazka honen zuzeneko biolentzia eta erasoa pairatzen ari garen bakarrak egun gu gara;euskal preso politikoen lagun eta senideentzako ez da garai berririk oraindik" adierazi dute, "Guri, astebururo, milaka eta milaka kilometro egitera behartzen gaituzte. Urduritasuna, nekea eta tentsioa dira, horren ondorioz, gure eguneroko ogia. Baina ez hori bakarrik. Larriki eri dauden presoen aurkako espetxe politika krudela eta basatia da, erabateko isolamendu egoerak bere horretan jarraitzen dute, presoen aurkako eraso fisikoak, edota katxeo eta jazarpenak guretzako".
Sakabanaketarekin behin betiko amaitzeko eskatu dute, Sarasate Pasealekua, zapi katearen bidez zeharkatuz.
