LABeko kide Imanol Salinasi 21 hilabeteko espetxe zigorra ezarri diote, Iruñeko La Sangiovesako jatetxeko langileen lan baldintzak eta pairatutako prekarietatea modu baketsuan salatzeagatik. Era berean, zigor eta isun larriak jarri dizkiete beste lan gatazkatan borrokan ibili diren zenbait langileri; Huerta de Peraltako borrokan ibilitakoei, kasu. Hala, jazarpen sindikala salatzeko eta langileen eskubideen defentsan jarraituko dutela berresteko, Iruñeko Justizia Jauregiaren aurrean elkartu da LAB sindikatua.
Iruñeko Justizia Jauregira eraman dugu jazarpen sindikalaren salaketa #BorrokaSindikalaAurrera mobilizazioek jarraipena izango dute, Hego EH-ko gainontzeko hiriburuetan egingo ditugun elkarretaratzeekin eta irailaren 28ko manifestazioarekin #ImanolLibre https://t.co/c0J7NNfJ51 pic.twitter.com/Pvfw8rmzPA
— LAB SINDIKATUA (@LABsindikatua) September 20, 2019
Mobilizazio gehiago aurreikusi dituzte: "Kalera irtetzeko arrazoiak soberan baititugu, borroka sindikala zilegia eta ezinbestekoa delako lan eta bizi baldintza duinak bermatu ahal izateko". Astelehenean, Donostia eta Bilboko epaitegietara eramango dute salaketa; eta asteartean, Gasteizko epaitegi aurrera. Datorren larunbaterako, irailaren 28rako, berriz, manifestaziora deitu dute Iruñean, 17:30ean, autobus geltoki zaharretik abiatuta.
