Nafarroako Gobernuak, Bake, Bizikidetza eta Giza Eskubideetako Zuzendaritza Nagusiaren bitartez, igandean kontzertua antolatu du terrorismoaren biktimen oroimenez, martxoaren 11n Terrorismoaren Biktimen Oroimenezko Europako Eguna dela-eta. Sarrera doakoa da, baina aurretik jaso behar da.
Kontzertua Musikaren Hiriko Fernando Remacha Auditorioan izango da, Iruñean, 19:00etan. Gonbidapenak martxoaren 9ra arte jaso daitezke 18:00etatik 20:00etarako tartean, Musikaren Hirian bertan (Antonio Pérez Goyena pasealekua, Mendebaldea).
In Tempore Abesbatzak, Ekko Ensemble musika-taldearekin batera, Kim André Arnesenen “The Wound in the Water” obra eskainiko du (Zauria uretan). Emanaldian, abesbatza zuzentzen Carlos Etxeberria Alonso arituko da, eta Andrea Jiménez sopranoa ere bai bakarlari gisa.
Martxoaren 11n Terrorismoaren Biktimen Oroimenezko Europako Eguna egiten da aspalditik. Europak egutegian egun bat jarri nahi izan du terrorismoaren biktimei eta haien senitartekoei babesa eta elkartasuna eskaintzeko. Modu horretan, Nafarroako Gobernuak bat egin du oroitzapenarekin, indarkeria terrorista behin eta berriz salatuaz eta egungo gizarteari eta etorkizuneko belaunaldiei memorian oinarritutako errespetu eta bizikidetzaren mezu bat helaraziaz, ekintza terroristak bezalako gertaera krudelak berriro gerta ez daitezen.
Kontzentrazioa martxoaren 11n
Kontzertuaz gain, martxoaren 11n bertan, Nafarroako Gobernuak kontzentrazio instituzionala egingo du Nafarroako Jauregiko atearen aurrean, terrorismoaren biktimen alde minutu bateko isilunea egiteko, 2016az geroztik egiten den moduan.
