Mikel Buil Ahal Duguko zerrendaburuak datozen foru hauteskundeetarako eskatu du heldu den legealdirako parlamentuak sortu dezala ikerketa batzorde bat Elizaren baitan gertatu diren eraso sexualak ikertu ahal izateko. "Salaketak, kasu berrien informazioa eta testigantza berriak azaltzen ari dira eta horiei arreta eskaini behar zaie", azaldu du. Hiru ekimen parlamentario eramanen ditu Ahal Duguk aurrera gai horrekin: "Biktimak izan direnak babestuak sentitu daitezen eta jakin dezaten nora jo dezaketen laguntza eske".
Alde batetik, telefono zenbaki espezifiko bat jartzeko aukeraz hitz egiten du Ahal Duguk. Biktimei aholkularitza eman ahal izateko, entzuna izan dadin eta Nafarroan jakin dadin zenbat abusu kasu gertatu diren Elizaren baitan. Bestetik, Gobernuak gai horren inguruan izan dezakeen informazioa helarazi dezala ere eskatuko dute eta ikerketa batzorde bat zabaltzea ere eskatuko dute heldu den legegintzarako.