Norberaren etxea kartzela bihurtzen denean

Norberaren etxea kartzela bihurtzen denean

Nafarroako Pertsona Ezgaitu Fisiko eta Organikoen Federazioko kideek arkitektura oztopoek suposatzen duten kartzela salatu dute. Eskailerak, atarietako koskak, buzoi eta atezain automatikoen altuera…askotan beren etxetik ezin atera bizi direla adierazi dute. Oztopo hauekin amaitzeko erraztasunak eskatu dizkiete erakundeei.

Erkuden Txokarrok jarri dio ahots eta aurpegia egoerari. Gurpildun aulki batekin mugitzera behartua azken urteotan, igogailurik gabeko 3.solairuko etxe batean bizi zen eta 4 urtez izan da etxera sartu ezinik. “Gurasoek lagundu naute beste etxe bat alokatu ahal izateko, bainan horrek dependentzia areagotzen du” azaldu du Txokarrok, “nire gurasoen laguntzarik izan ez banu eta nire auzolagunek igogailua jartzeko onespenik eman ez balute, ze aukera izanen nuke?”. Legeak ez ditu auzokide komunitateak behartzen obrak egitera, beren kostua 12 kuotetatik gora badoa. Aldaketak eta erraztasunak eskatzen dizkiete agintari eta erakundeei, arkitektura oztopoak kendu ahal izateko. Ez soilik eskailerak eta igogailuen kasuan, baita ate pisutsuak, buzoi eta atezain automatikoen altuera, atarietako koskak egokitzeko ere.