Gobernu jauregiaren atarian, kontseilari, zuzendari eta baita gobernuko langileak ere konzentrazioa egin dute emakumeen kontrako indarkeria salatzeko. Haien ondoan beste erakundeetako kideak ere, Nafarroako udal eta Kontzejuen presidentea, Gobernuko delegatua, Guardia Zibila eta Espainiako Polizia. Agerraldi isila izan da, indarkeriaren kontrako sinbolo diren esku moreen aurrean egindakoa. Maria Solana, gobernu bozeramaleak, tratu txarrekin amaitzeko oraindik ere lan asko egiteke dagoela adierazi eta adibide moduan, aste honetan ezagutu den indarkeria matxistaren inguruko sententzia aipatu du.
Nafarroako Gobernuko bozeramaleak bezala, Joseba Asiron alkateak ere, azken epaiei erreparatu die Indarkeria Matxistaren kontrako egun honetan. Gizartean eta politika mailan dagoen batasuna eta epaitegien jarreraren artean tarte handiegia dagoela salatu du Iruñeko alkateak.
Konzentrazio berezia egin du Iruñeko udalak. Hunkigarria. Lurrean markatuta, aurten estatuan erahildako 46 emakumeen zenbakiak. Adierazpen instituzionala irakurrita, loreak jarri dituzte marka bakoitzaren ondoan bertan bildutako hiritarrek. Udalean ordezkaritza duten alderdi guztiek parte hartu dute konzentrazioan.