Onzineda proiektuak buruhauste ugari eragin ditu Lizarran legealdi honetan. Proiektu hori UPN eta PSNk kudeatu zuten "modu okerrean". 2005ean, Lizarrako udalbatzaren gehiengo handi batek Onzinedako lursailean kiroldegi bat egiteko proiektuaren alde egin zuen. Horretarako, 89.000 metro koadroko lurraren desjabetzea planteatu zen. Ibarra izeneko tokian eraikigarriak ziren zoruen ordez trukatzea planteatu zitzaien jabeei. Bederatzi hitzarmen sinatu ziren jabeekin, eta horietatik zazpi kasutan eranskinak gehitu zitzaizkien kontratuei.Itun eta eranskin horiek 2006 eta 2008 artean sinatu zituzten orduko bi alkateek: PSNko Maria Jose Fernandezek 2007ko maiatzera arte, eta hortik aurrera UPNko Begoña Ganuzak.
Nafarroako Kontseiluak txostenean dio "prozedimenduan akats eta arau-hauste nabarmenak" egin zituztela bi alkate horiek. Horrez gain, Kontseilu horrek Onzinedako hitzarmena eta eranskinak efekturik gabe utzi ditu. "Eranskinen sinadurarekin interes pribatuei men egin zaie" dio gainera Nafarroako Kontseiluko txostenak. Lizarra mehatxu erraldoi batetik libratu dugu", esan du egun alkate den EH Bilduko Koldo Leozek. "Aurreko alkateek oker egindako kudeaketa baten ondorioak ez dituzte herritarrek ordaindu beharko", azpimarratu du gainera. Kontseiluak argitaratu du horrez gain alkateek ez zutela eskumenik eranskinak sinatzeko. "Ardurak eskatuko dizkiegu alkateei", ohartarazi du Leozek.
