Nafarroako Probintzia Auzitegiak berak esan zuen, iaz, Altsasuko auzia bertan epaitu behar zela, eta behin baino gehiagotan aldarri hori bera egin dute Altsasu Gurasoak taldeak, sindikatuek eta parlamentuko gehiengoak. Gaur, Abokatuen Kolegioko arduradunari eskubide hori bermatu dezan eskatu diote LABek, ELAk, ESKk, CGTk, STEILASek, EHNEk eta HIRUk, erregistratutako idazki baten bitartez.
"Nafarroan epaitu behar da Altsasuko auzia. Horrela esan zuen Nafarroako Auzitegiak ere", adierazi du Iratxe Alvarez ESKko kideak, gainontzeko sindikatu guztien izenean. "Neurritasun eza" zigor eskaeretan eta "gazteek pairatzen duten egoeran" dagoela deritzote, halaber; era berean, hiru gaztek espetxean hamasei hilabete daramatzatela izan dute gogoan.
"Elkatasuna adierazi nahi diegu auzipetuei eta senideei", esan du Alvarezek, eta langileriari dei egin dio, larunbateko mobilizazioarekin bat egin dezan. Mobilizazioak Justizia leloa izanen du eta Golem zinemetatik abituko da, larunbatean, 17:30ean.
Astelehenean hasiko da epaiketa
Apirilaren 16an hasiko da Altsasuko gazteen kontrako epaiketa Auzitegi Nazionalean. Sindikatuek antolatzen diren babes mobilizazio guztietara joateko gonbita luzatu diete herritarrei.