Nafarroan, 14 urtetik beherako 200 neska gazte daude ablazioa sufritzeko arriskuan, Munduko Medikuak elkarteak jakinarazi duenez, Wassu Fundazioaren txostenean oinarrituta. Horregatik, praktika hori desagertzeko lanean ari dira, "informazioa eta prebentzioa" oinarrian, Patricia Ruiz Munduko Medikuak elkarteko koordinatzaileak esan duenez; 2017an, guztira, 259 tailer egin dituzte, informazio emateko. 50 boluntario daude eta 10 mediatzaile, eta haiek egiten dute lotura ablazio sufritzeko arriskuan egon daitezkeen komunitateekin -batez ere, Nigeriako, senegaleko, Gambiako Maliko eta Ghanako pertsonekin aritzen dira-.
Halaber, jada ablazioa pairatu dutenei "artatze integrala" eman behar zaile defendatu dute: "laguntza psikologikoa, terapia afektibo-sexuala eta genitalen berreraikuntza".
Nafarroan, protokoloa martxan
2013. urtetik ablazioaren kontrako protokoloa martxan dago Nafarroan, Munduko medikuak elkartearen eta Nafarroako Berdintasun Institutuaren elkarlanari esker; gaur, positiboki baloratu dute , nahiz eta, "oraindik ere", profesionalen artean protokoloaren inguruko “ezjakintasun handia” dagoen.
Mundu mailan gora
Handitzen ari den praktika da ablazioa mundu mailan, 2008 eta 2016 urteen artean, %63,85an egin du gora. Batez ere Afrikan egiten da -%92koa da portzentzaia-, baina bada AEBetan eta Hego Amerikan ere. Horrez gainera, sartzen ari da berriz ere desagertuta zegoen tokietan, Iraken eta Indonesian, esaterako. Orotara, 29 herrialdetan egiten da, Munduko Medikuen datuen arabera.
