Hemezortzi lagun kaleratu ditu Eroski Taldearen parte den Caprabok; hemezortzi emakume langile. Salatzeko, greba mugagabeari ekin diote beharginek: birkolokatu ditzaten dute xede. Protesten artean, parodia egin dute, hileta martxa, hain zuzen. Hilkutxak eskuetan, bizkar gainean eta beltzez jantzita, hemezortzi lanpostu eta lau denda "erail" dituztela salatu dute. Grebak iraun bitartean Eroskin eta Caprabon ez erosteko deia egin dute langileek.
Langileak, parlamentura
Nafarroako Parlamentura joanen dira gaur Eroski-Capraboko langileak, kaleratzeen berri eman eta parlamentuko taldeei enpresako zuzendaritzarekin kudeaketa lana egin dezaten eskatzeko.
"Borondate kontua"
Kalera bota ditu Eroski Taldeak hemezortzi lagun, "irabaziak baditu ere". Hori da Enpresa Batzordeak salatu duena. Eroski "gai" da hemezortzi pertsona horiek guztiak Nafarroan "birkolokatzeko", "une honetan borondatea da faltan duen bakarra".
Batzordea Eroskirekin bilduta zela jakinarazi zieten langileei kalera zihoaztela, negoziazioak oraindik martxan ziren bitartean.