Proportziorik gabe. Bidegabe. 100 egun espetxean, bahituta. Ikerketarik eta epairik gabe zigortuak. Hitz horiek erabili ditu Haizea Ramirez de Alda Altsasuko zinegotziak eta Adur Ramirez de Aldaren senideak Euskalerria Irratian egindako elkarrizketan. "100 egun daramatzate espetxean Oihanek, Jokinek eta Adurrek", gogorarazi du. "100 egun bahituta". "Justiziaren erabilera interesatua dela erakutsi dute azken egun hauetako jarrera eta erabakiek", azaldu du erreferentzia eginez ustelkeriagatik kalean utzi dituztela atzo bertan. "Ihes egiteko arriskurik ez da, behin eta berriz aurkeztu zutelako euren burua auzitegietan. Auziak, zentzugabea den norabidea hartu du".
Altsasun eta Altsasutik bidegabekeriarik eta injustiziari erantzun irmoa ematen diote herritarrek eta hori ere Oihani, Jokini eta Adurri helarazten dietela nabarmendu du Ramirez de Aldak. "Indartsu daude jakinda babesa dutela gure partetik".
Elkarretaratze eta protestak
Ostiralero Altsasun egiten dute elkarretaratzea. Jende ugarik egiten du salaketa kalean. Gaur, Iruñean eginen dute. 100 egun daramatzate espetxean eta egun hori baliatuta hiriburura eramanen dute protesta. 19:00etan Sarasateko pasealekuan eginen dute protesta.