"Ezin da onartu, ezta normaltzat hartu ere, pertsona bat zendu daitekeenik zebrabide bat igarotze hutsarengatik; izan ere oinezkoak dira bertan lehentasuna dutenak", esan du Ekologistak Martxan-ek, "autoaren kultura" kritikatzearekin bat, larunbatean, Gipuzkoa etorbidean zendu zen emakumearen kasua gogoan.
Autoak mantsoago joatea "ezinbestekoa" da talde ekologistaren irudiko. Hainbat neurri proposatu dituzte zirkulazioa kontrolatzeko: zebrabide altuagoak jartzea edota semaforoak instalatzea, besteak beste.
"Trafikoa baketzea". Horra egin beharrekoa. Iruñean, urtero bi eta lau pertsona artean hiltzen dira, ibilgailuek harrapatuta. 2017an, jada hamalau lagun harrapatu dituzte autoek eta lagun bat zendu da. Iruñeko Udalaren datuen arabera, hamar harrapaketatik zazpi zebrabideetan dira eta hilketa gehienak ere bertan izaten dira.