Haurrek klasea ordutegi jarraiagoan izan eta eguerdi partean ateratzea da eskola jardunaldi jarraituaren apustua. Eguerdian umeak jaso ezin izanen lituzketeen guraso horientzako ere badu alternatiba: jantokian bazkaltzen geratu eta eskolaz kanpoko jarduerak egin ditzatela haurrek, eskolan bertan, ohiko ordutegiaren irteera ordura arte.
Kontrako eta aldeko iritziak dauzka jardunaldi jarraiak: batzuen aburuz, ikasgai gehiegi ordu gutxian ezartzen duen bitartean; besteen ustez, malguagoa da. Gauzak nola diren, atzo amaitu zen eskolek Hezkuntza Departamentuari aukera hori hartuko zutela iragartzeko epea eta, dirudienez, arrakasta izan du: 40 bat ikastetxek bat egin dute.
Familiei galdeketak egin dizkiete eredua ezarri aurretik, eta horren arabera txertatu dute. Batez ere, Erriberan izan du babesa jardunaldi jarraiak.