2012ko irailak 26 zituen Atarrabiako herritar Aingeru Zudairek pilotakada baten ondorioz begia galdu zuenean. Espainiako Polizia batek botatako pilotakada baten ondorioz, hain justu. Geroztik, gertatutakoa argitzeko lanean dabil.
Orain arte, Otamendi epailearen esku zegoen kasua, baina hark artxibatzea agindu zuen; orduan, helegitea aurkeztu zuen defentsak, eta, orain, errekurtso hori onartu du Nafarroako Probintzia Auzitegiko Lehen Sailak: ikertzen segiko du, are agente baten plaka zenbakia aintzat hartuta, haren jardunean oinarrituko dituzte ikerketa lanak.
Bideo batean, polizia hori ikus daiteke, "tiro egiteko ekinean, salaketa jarri duenaren norabiderantz tiro eginez". Halaber, txostenak dio Zudairek begian jasotako kolpeak bat egin dezakeela "energiaz botatako objektu sendo batekin".
Piloten erabilera, zalantzan
Pilotak erabili behar ote direnetz. Eztabaida hori zabaldu dute Atarrabiako herritarrek Zudaireren kasuaren karietara, aintzat hartuta herritarrei eragin diezaieketen kaltea.