Urteko laugarren hiruhilekoan 60 milioi ordaindu dizkio Nafarroak Madrili. Espainiak nahi baino 93 milioi gutxiago. Baina, guztira, urte osoko ordainketak aintzat hartuta, 520 milioi euro dira estatuari emandakoak.
Lauko gobernuaren iritziz, hori ere behar baino "gehiago" da; izan ere, ez dago 2015-2019 urteetarako hitzarmenik eta, beraz, airean dago ordainketak zenbatekoa izan behar duen. Ez dago finkatuta.
Gaur, Nafarroako Gobernuaren erabakia kritikatu du UPNko Jose Javier Esparzak. Espainiari "hitzartutako guztia" eman beharko liokeelakoan dago, alegia, orain emandakoa baino 93 milioi euro gehiago. "Hitzari ezin zaio uko egin, hitzarmena ezin da alde batera utzi, sinesgarritasun gutxi izatea da...", esan du UPNko kideak.
Paradoxa oinarrian
Paradoxikoa da gaia, ordea: batetik, Esparzak onartu egin du Nafarroa Espainiari behar baino gehiago ordaintzen ari dela; baina, bestetik, ordaindu behar duela dio. Zergatik? Bada, UPNren aburuz, aurrena ordaindu egin behar delako eta ostera, gehiegizko ordainketak egin izan badira, Espainiako estatuak bueltatzeko zain egon.
Lauko gobernuri leporatu dio, gainera, aurrekontuetan duen "zuloa" estaltzearren ez diola gehiago eman Espainiri.
Espainiarantz begira
Bestalde, Espainiara begira jarri da UPNko politikaria. Hauteskundeetan koalizioa egin bazuen ere PPrekin, gaur esan du ez duela "inongo loturarik" popularrekin. Eta argi eta garbi mintzatu da: "PPk ez badu Nafarroa ongi tratatzen", UPNk ez ditu haren aurrekontuak babestuko Espainian.
Eta "ongi" tratatzeaz ari denean, honako gai hauetaz ari da politikari erregionalista: Nafarroako Ubidearen bigarren zatia eraikitzeaz, AHTa martxan jarri eta Espainiak zorretan dauzkan 45 milioi euroak bueltatzeaz , CENERekin hitzarmena berriz sinatzeaz eta Soria-Tutera proiektua indartzeaz.