Euskalerria irratiarekin hitz egin du gaurko deklarazioen ostean Amaia Izko abokatuak. Altsasuko auzian espetxean dauden zazpi gazteek eta kalean dauden beste bi auzipetuek gaur epailearen aurrean deklaratu dute. “Ez daude ados egitateekin ez eta inkriminazioekin ere eta horixe esan diote epaileari”, azadu du Amaia Izko abokatuak. Gaurko deklarazioa tramite hutsa izan dela nabarmendu du abokatuak.
Atzoko ebazpenaren zain daude, espetxean dauden zazpien askatasuna izanen ote den datozen egunetan erabakiko du epaileak. Bestetik, gazteei egozten zaizkien delituak ere errekurrituta daude eta epaitegiko laugarren aretoak ebatzi beharko du, “terrorismo delituaz hitz egiten den edo legea hartuta ezin den horretaz hitz egin”.
Gaurkoan, epaileak ez ditu onartu defentsak aurkeztu dituen lekukoak ez eta dokumentuak ere. Helegitea jarriko dute. Epaitegiaren jarrera salatu du Izkok: “Erabateko balioa ematen dio gazteen aurkako salaketari eta ez du aintzat hartu ere egin nahi gazteek aurkeztu nahi dituzten lekukoak eta dokumentuak. Defentsa eskubidea guztiz urratzen ari da”.
Gazteak indartsu ikusten ditu Izkok. Bizilagunen, herritarren eta senitartekoen babesa laguntza handikoa zaie, egoera gogorrari aurre egiten laguntzen diena.
