2010ean eta 2012an jarri zituzten martxan indarkeria matxistaren biktimei harrera emateko zerbitzu integralak Lizarran eta Tuteran, hurrenez hurren; beharra egon bazegoen, biolentzia matxista pairatu duten emakume askok jo baitute bertara.
Aurtengo datuak kontuan hartuta, urtarrilaren hasieratik urriaren 30era, 260 emakumek jo dute Tuterara eta Lizarrara 121. Horiek azken hamar hilabeteetako datuak baino ez dira.
Herrialde guztiari zuzendatuta
Orain, Nafarroa osora zabaldu dute zerbitzua: Tafallan eta Txantrean ireki dituzte bi unitateak, baina inguruko herri guztietako emakumeei laguntza eskaintzea da helburua.
Txantreakoak Iruñerria guztiko herriak eta auzoak beregain hartzeaz ez ezik, Altsasu, Elizondo, Etxarri Aranatz, Irurtzun, Leitza, Lesaka eta Doneztebeko emakumeez ere arduratuko da. Tafallakoak, Artaxoa, Olite, Azkoien eta Zarrakazteluko emakumeei eskainiko die zerbitzua.
Bietan psikologoak, gizarte langileak eta hezitzaileak ariko dira lanean, errekuperazio, ahalduntze eta autonomiaren bilaketan.
Emakumeen aurkako indarkeriaren aurka "lan irmoa" egin behar dela esan du gobernu ordezkariak, belaunaldi gazteenei arreta paratu behar zaiela azpimarratzearekin bat. Bestalde, mito bat deuseztatu nahi izan du: salaketen igoerak egoteak ez du esan nahi eraso gehiago dagoenik, baizik eta gehiago salatzen dela.