ICF-Faurecia itxi ez dezaten epaitegietara jo dute langileek, "ez baitago ekoizpen ez ekonomia arrazoirik", batzordearen hitzetan. Multinazionalak abenduaren 31n ixteko xedea du. Orain, itxiera hori atzeratzea da langileen asmoa, behintzat 2017ko ekainera arte.
Ez da hutsala data hori finkatu izana: izan badute eskaria ordura arte ekoizpenean segitzeko, eta, gainera, orain dela sei hilabetetik berrindustralizazio prozesuan dago lantegia: sei hilabete gehiago izanez gero, uste dute erosleren bat azaltzeko aukera dagoela.
Poloak ekoizten ari dira Wolskwagenen
Soka luzea dauka gaiak. Aurtengo martxoan adostu zuen batzordeak ICF-Faureciako zuzendaritzarekin instalazioa abendura arte irekita mantentzea, Wolkswagenek polo ekoizpena utzi behar zuela uste zenean.
Alemaniako erraldoiaren Iruñeko fabrikak jarraitu egin du polo ekoizpenarekin, ordea, eta bestelakoa da egoera: "guztiz", langileek diotenez.
"Bi milioi euro baino gehiagoko irabaziak dauzkate". Horra salatu dutena.
Hain zuzen ere horregatik uste du enpresa batzordeak hasieran sinatu zuten akordioaren nondik norakoak asko aldatu direla, eskaria eta eskaintza egon baitago.
Demanda, martxan
Momentuz, demanda aurkeztu dute epaitegietan, eta heldu den asteak epaileak erantzunen bat ematea da espero dutena. Bestalde, fabrika erosi lezakeen eroslearen zain ere badaude.
