"Bigarren Hezkuntzako oposizioak deitzeko egitasmoaren aurrean gure kezka adierazi nahi dugu", hala ekin zioten LAB, Steilas eta ELAk prentsaurrekoari. Lan Eskaintza Publikoa aurkeztu baino lehen, eta batez ere azterketak noiz izanen diren zehaztu aurretik "egoeraren diagnosi sakona" egin behar dela iritzi dute "etorkizuneko beharrak identifikatzeko eta ondoren ahalik eta oposaketa prozesu aberatsena aurkezteko".
Hezkuntza Departamentuak oraindik ez die aurkeztu zein izanen den proposamena Lan Eskaintza Publiko horretan. Ez dute onartuko berriz arduragabekeriaz kudeatutako prozesua eta hori ekiditeko lan egiteko konpromisoa berretsi dute sindikatu horietako eledunek.
Heldu den ikasturterako ez dute ikusten Lan Eskaintzaren azterketa egiteko aukerarik dagoenik, baldintzak ere ez. Gobernuari eskua luzatu nahi diote elkarrekin lan egiteko eta Lan Eskaintza Publiko horren ezaugarriak denen artean lantzeko.