Garapen Iraunkorraren Helburuak finkatu eta horiek lortzeko bideak zeintzuk diren aztertuko dute heldu den astean Nafarroako Parlamentuan. Guztira 150 entitatek hartuko dute parte.
Baina zer da zehazki garapen iraunkorra? Bada, ondorengo belaunaldien garapena eragozten ez duena, baliabide naturalen eta ondarearen kalitatea eta kantitatea zentzuz kudeatzen duena. Xedea, aurrerapen ekonomikoa, bidezko gizartea eta ingurumenaren babesa uztartzea da.
Horiek guztiak hizpide izanen dituzte astearean Parlamentuan antolatu diren jardunaldietan. Goizeko bederatzi terdietan hasi eta goiz osoan ariko dira garapen iraunkorra lortzeko lanean ari diren adituak. Ainhoa Aznarezek gaur arrera egin dien Nafarroako Gobernuz Kanpoko Erakundeen Koordinakundeko kideei.
Garapen Iraunkorrean aurrera egiteko, gizartearen pentsamoldea aldatzea pausoetako bat litzateke. Guztioi eragiten digulako eta beste modu batean ekiteak onuragarria litzatekeelako.
Mundu mailako hausnarketa da garapen iraunkorrarena. Nafarroatik zer egin daitekeen? Bada, hemen bizi dugun egoera aztertu, diagnostikatu, horren araberako helburuak finkatu eta xede horiek lortzeko lanketa prozesua abian jarri. Pobreziari eta desberdintasunei aurre egiteko, ekonomia solidarioa eta garapenerako kooperazioa garrantzitsu jo dituzte.
Asteartean beraz Nafarroako Parlamentuan 150 entitatetik gora ariko dira zenbait aditurekin batera jardunaldietan parte hartzen. Arratsaldean gainera, osoko bilkura eginen dute gaiaz eztabaidatu ahal izateko.