Yoar gazte elkarteari 130.000 kontratu esleitzea onartu du Iruñeko Udalak. Aranzadi abstenitu egin da botazioan, alderdiko Laura Berroa Berdintasun eta LGTBI zinegotziak, baina, aldeko botoa eman du. Hautsak harrotu dira eskuin mediatikoaren frontean. Izan ere, Berroren ahizpa da Yoar elkarteko presidentea. Zinegotziak adierazi du "akats txiki bat, lapsus bat" izan dela aldeko botoa ematea.Halaber, jakinarazi du ahizpak ez duela kobratzen gazte elkartean egindako lanarengatik eta 14 urte daramatzala boluntario gisa.
Zenbakiei so, zinegotziak botoa eman ala ez eman, deus ez litzateke aldatuko, bazuen eta gehiengoa diru laguntza esleitzearen aldeko proposamenak. Beste elkarterik ez zen aurkeztu, gainera, kontratu hori eskuratzeko.
"Nire gain hartzen dut ekintza, eta, noski ez da berriz gertatuko. Nahaste bat izan da, ez besterik", esan du. "Inor ez zen ohartu alderdiak ez bezala bozkatu zuela, ezta idazkaria ere", Berroren hitzetan. Dionez, bera ere ez zen jabetu.
Testuinguruan kokatu du auzia Berrok: "aldaketaren udalaren politiken kontrako erasoa da, nire aurka egin duten arren".
UPN eta PSN, dimisioaren zain
UPNk eta PSN haren dimisioa eskatu dute, eta Esparza erregionalistak "gisa horretako ilegalitatea" egin ostean, nork bere gain hartu behar duela esan du: "ezin du horrela jokatu, hau oso serioa da, bizitza politikoa oso maila baxura jaisten ari dira". PSNko Maite Esporrinek jakinarazi du "oso larria" deritzola haren alderdiak Berroren jokabideari. "Arrazoibidea barregarria da, ez dira politika berriak, politika zaharrak dira, existi litekeen politika txarrenekoa".