Jose Luis Mendoza Hezkuntza Kontseilariak agerraldia egin du Nafarroako Parlamentuan berak hala eskatuta, PAIren inguruko ebaluazioaz eta Derrigorrezko Bigarren Hezkuntza eleaniztunaren ezarpenaz hitz egiteko.
Heldu den urtean Zizur Nagusiko Catalina de Foix eta Camino de Santiago eta Txantrea-Ezkabako Iñaki Ochoa de Olza institutuetan Bigarren Hezkuntza eleaniztuna izanen dute Lehen Hezkuntzan PAI programan ikasi duten ikasle berriek. Hauek zuzenean hartu ahal izanen dute aukera hori. PAI programan ikasi ez dutenek aukera izanen dute sartzeko, baina aldez aurretik mailaketa froga bat egin ondoren. Ikasleek bi ikasgai izanen dute ingelesez eta ingelesa ikasgai gisa. Denera 8 ordu astean gutxienez eta 12 gehienez.
Neurri hau “zabalgarria” dela esan du Mendozak, egun 106 baitira PAI programa duten Lehen Hezkuntzako ikastetxeak Nafarroan.
British eredua duten ikastetxeei buruz Mendozak esan du jarraipena izanen dutela dagozkien institutuetan, bere garaian sinatu zuten bezala. Horrela, Jose María Huarte ikastetxe publikokoak Basoko institutura joanen dira.
PAI programaren ebaluazioaz Mendozak berretsi du “ezinbestekoa” dela programak dituen akatsak zuzentzeko eta behar dituen baliabideak emateko eta kritikatu ditu atzerriko hizkuntzen irakaskuntzarekin amaitu nahi dutela leporatzen dietenak, gezurretan ari direlakoan.
Ebaluazio honetan ikusi dute programa azkarregi ezarri zutela, baliabide eta informazio gutxiegi emanez. Horrela, ikastetxeetako zuzendari batzuk “desadostasunaz” eta areago “inposizioaz” mintzatu direla adierazi du Mendozak.
Urtea amaitu baino lehen, datu guztiak analizatu ondoren, aditzera emanen du Gobernuak zer urratsak jarraituko dituen PAIren inguruan.
Aldaketaren aldeko lau indarretako ordezkariek berretsi dute PAIri buruzko ebaluazioa egin beharra.
