"Pistolekin edo gabe, Nafarroak Euskal Autonomia Erkidegoarekin bat egitea nahi dute Euskal Herria deitzen duten asmakizun hori eraikitzeko", hitz horiek erabili ditu bart UPNko presidente izendatu berriak, Javier Esparzak. Uxue Barkosen Gobernuari erreferentzia egin dio, horiexek baitira lehendakariaren asmoak erregionalistaren esanetan.
Euskararen mamuak
Euskarari ere kritika ugari egin zizkion Esparzak: "Gobernura itzuliz gero eremu ez-euskaldunetik kendu eginen dugu D eredua ikastetxe publikoetatik". Arrazoitu zuen esanez, "inposaketa artifiziala dela eta gastu ekonomikoa eta desoreka baino ez du eragiten". Inposaketa zentzugabe hori amaitzeko lan eginen duela ohartarazi zuen UPNko presidente berriak.
"Nafarroa anitz eta aberats" baten alde jardungo dutela, eta "Espainiaren eta Europaren barruan" egonen den Nafarroan eginen dutela lan. Alderdiaren datozen urteetarako programa onartzeaz gain, Gobernurako, Kongresurako eta Senaturako hautagaitzak primarioen bidez aukeratzea ere onartu dute militanteek.
