Burlatako atxiloketez eta balizko hauteskundeetarako koalizioaz mintzatu gara parlamentarien solasaldian, Geroa Baiko Jokin Castiella, EH Bilduko Bakartxo Ruiz, Ahal Dugu- Podemos alderdiko Ainhoa Aznarez eta Ezkerrako Joseba Ezeolazarekin. Iruñeko autobus geltoki zaharrean, ekonomia solidarioa sustatzeko zentroa, artista gazteentzako espazioa eta aisialdirako tokia zabaltzeko asmoa dago. Geltoki proiektuaz mintzatu gara REAS elkarteko kide David Garnatxorekin eta Iruñeko alkateorde Patri Peralesekin. Sanmarrazkin afixak iragarriko ditu aurtengo sanferminak. Mikel Mendibil Patricia Martiartu, Mikel Santos eta Eneko Uharte sortzaileek egin dute lana, Buztintxuriko eskola publikoko ikasleen laguntzari esker. Mikel Mendibil irrintzi dorrean izan dugu. Kantu inprobisatuaren nazioarteko topaketa gaur Zentral aretoan. Horren berri eman digu Irati Majuelo bertsolariak. "Artikoa hausten ari da" erakusketa zabaldu dute Sarasate pasealekuan. Xehestasunak Xabier Santamaria zientzia zalearen eskutik.
