Urzanten eta Añezkarren deshobiratu zituzten hamabi pertsonen gorpuzkiak, eta, orain, "identifikatu arte duintasunez deskantsatu dezaten", Iruñeko kanposantuan lurperatu dituzte, lore eskaintza egitearekin batera.
Bertan egon dira Iruñeko alkate Joseba Asiron, Nafarroako Gobernuko ordezkari Ana Ollo eta AFFNA 1936 Nafarroako Fusilatuen eta Senideen elkarteko presidente Olga Alcega, eraildakoei omenaldia egiteko.
Familien esku
Momentuz, ezezagunak dira ehortzitako hamabiak, haatik, DNAri esker etorkizunean jakin liteke nor diren. Identifikatzekotan, senideen esku egonen da zer egin gorpuzkiekin. Bitartean, gaurtik aurrera, hilerriko San Felizia kalean daude.
2014ean Iruñeko udalak eta Nafarroako Gobernuak onartutako hitzarmen bati jarraiki, 1936ko biktimak egoteko tokia egokituta dago San Joseko kanposantuan. Hamar pertsona zeuden bertan, lehen; 22, aldiz, orain. Guztira, 60 egon daitezke.