Legealdia hasi zenetik, 379 ekimen aurkeztu ditu Javier Esparzaren taldeak. Gehienak galdera sinpleak, gobernuaren lana ezbaian jarriz. Esaterako, Opuseko langileak ere, gainontzeko herritar guztiak bezala, osasun publikora joanen zirela kaleratzerakoan, auziaren inguruko 57 galdera aurkeztu zituzten. Oso antzekoak gehienak: are gehiago, galdera batetik bestera, hitz bakarra baino ez zen aldatzen zenbait kasutan.
Osotara, 166 izan dira idatziz egindako galderak, 88, berriz, ahozkoak; agerraldi eskaerak, 23; eta interpelazioak, zazpi.
Horiek guztiek ez dute exijitzen proposamenik edo bestelako politikarik aurkeztea, beraz, atakean aritzeko aukera eskaintzen diete erregionalistei. Bestalde, gobernua kontrolatzeko 332 neurri proposatu ditu.
Praktika eraikitzaileak eskas
PPk bi aulki dauzka, eta 44 proposamen egin ditu. Konparazioa egin daiteke UPNren jardunarekin, izan ere, erregionalistek 47 egin dituzte. Hori bai, UPNk hamabost ordezkari dauzka. Nabarmena da, ondorioz, aurrera begirako proposamen gutxi gauzatu dituela.