Baztango bizilagunen iritzia jakin gabe Aroztegiko proiektua inposatzen ari direla salatu du Aroztegia eta gero zer? Plataformak. Galdeketa egin dezatela eskatu dute. Bailarako herritarren nahia entzun eta ondoren hartu dezatela erabakia. Baina ikusirik Geroa Baik ez duela asmorik halakorik planteatzeko, plataformaren bidez eta herritarren ekimenez abian jarriko dute galdeketa. Horrez gain, sinadura bilketa ere eginen dute Baztango Udalari eta Batzar Nagusiari eskatzeko, herri galdeketaren prozesura martxan jartzeko.
Udalez Gaindiko Proiektua da Aroztegikoa. Nafarroako Gobernuak du eskumena eta hagatik, egitasmoaren aurkako plataforma Gobernua babesten duten alderdiekin bildu da. EH Bildu, Podemos-Ahal Dugu eta Izquierda-Ezkerrak plataformaren eskaerekin bat egiteko prestutasuna azaldu dute. Geroa Baik ordea jarrera “hertsia eta zakarra” ditu. “Geroa Bairi erosoago zaio “kapitalismo neoliberala bultzatzen duten eta epaitegiek zigortutako enpresari iruzurgileen interesak inposatzea, Baztango gehiengo sozialaren interesak defenditzea baino”.
Herri galdeketa herri ekimenez jarriko dute martxan, baita sinadura bilketa ere. Horrez gain, manifestazioa ere eginen dute heldu den apirilaren 23an Elizondon. Aroztegiko proiektua gelditzeko eskaera eginen dute eta bizilagunei galdetzeko egitasmoaren inguruan zein iritzi duten jakiteko.