Mugaz gaindiko gisa horretako lehen proiektua da, heldu den ikasturtean martxan jarri nahi den eskola berri hau. Estebe Petrizan Nafarroako Gobernuko Hezkuntza Zuzendari Nagusiak Ipar Euskal Herriko Hitzari adierazi dion bezala “proiektua oso ona da berez” eta proiektua bideratua bada ere oraindik ez dela bururatua gehitu du: “zenbait akordio bai badirela, diseinua ere egina dago, baina ez dago arras onartua oraindik, gurasoak dira protagonistak. Hiru hizkuntzetan lan egingo dute, oso interesgarria da. Badugu muga hor dagoena, alde batean gaztelania eta euskara ofizialak dira, beste aldean frantsesa bakarrik, baina funtzionaltasuna baloratzen dugu, mugaz bi aldetatik dauden hizkuntzak kontuan hartuz, ingelesa ere bai, nahi bada eskualdetik atera, baina gaur egun ditugunak hirurak dira; beraz, Luzaideko neska-mutilek euskara frantsesa eta espainola jakin behar dute”.
Arnegik 23 ikasle dauzka; Luzaidek, berriz, 13. Eskola berrian bi eraikin desberdinetan arituko ziren haurrak, proiektuaren arabera: goizez herri batean eta arratsaldean bestean. Ikasleen mugimenduak errazteko taxi zerbitzua jartzeko asmoa dute.
Oraindikan gai askotan adostasun falta nabaria bada ere, gurasoen esku dago erabakimena. Haiek erabaki behar dute zer proportzio eman hizkuntza bakoitzari edota erlijio klaseekin zer egin.